مہتاب حیدر نقوی کی دس غزلیں

غزل

وہ  بستیاں، وہ  بام ، وہ در کتنی دور ہیں

مہتاب ! تیرے  چاند  نگر  کتنی  دور  ہیں

وہ خواب، جو غبار گماں میں نظر  نہ آۓ

وہ خواب تجھ سے دیدۂ تر کتنی دور ہیں

بام  خیال  یار   سے  اترے   تو   یہ  کھلا

ہم  سے ہمارے شام و سحر کتنی دور ہیں

اے   آسمان!   ان  کو   جہاں   ہونا  چاہئے

اس خاک سے ، یہ خاک بسر کتنی دور ہیں

بیٹھے  بٹھاۓ  دل کے سفر پر چلے تو آۓ

لیکن  وہ   مہربان  سفر  کتنی  دور   ہیں

یہ  بھی  غزل  تمام  ہوئی ، شام ہو چکی

افسون  شاعری  کے   ہنر  کتنی  دور  ہیں

————————————-

غزل

لفظ  اس  کے  ہیں مگر  ان میں  روانی میری

قصہ  گو   کوئی  سہی   ہے  تو   کہانی میری

لوگ  راوی  کے  کہے  کو ہی حقیقت سمجھے

مجھ  سے  سنتا   کوئی  آشفتہ  بیانی  میری

زخم   بھرنے   کے  لۓ،  داغ  ہیں مٹنے کے  لۓ

نقش   بر   آب   ہے   ہر    ایک   نشانی  میری

دست   تائید  پہ رکھے ہیں ادھر جام پہ جام

حرف    انکار     ادھر    تشنہ    دہانی  میری

میں نے سو طرح سے، سو بار جتن کر دیکھا

اس  نے  اک   بار  مگر  بات  نہ  مانی  میری

اور  پھر اب  کے  سخن کا  وہ  تقاضاۓ  ہنر

اور   پھر  اب  کے   وہی  ہیچ  مدانی میری

————————————-

غزل

پھول ہی پھول جو سینے پہ کھلاۓ ہوۓ ہیں

ان  دنوں  ہم  نگہ  یار   میں  آۓ   ہوۓ   ہیں

اسی  امید  پہ  ہم  بھی کہ  بر آۓ  گی  امید

علم     رفعت     انکار    اٹھاۓ     ہوۓ    ہیں

ہے   یہی منظر  و  ماحول تو  دستار کی خیر

ہم   ابھی  عزت  سادات   بچاۓ   ہوۓ   ہیں

عشق   ہے   یا   کہ  ہوس  اہل  ہنر  ہی جانیں

ہم  تو اک حسن  بلا سر  پہ اٹھاۓ  ہوۓ ہیں

یہ  جو  اشعار  بہ اصرار   لکھے  ہیں  ہم  نے

ایک  گنجینۂ  معنی کو  چھپاۓ   ہوۓ   ہیں

شام    مہتاب   غنیمت   ہے    نظارہ  کر   لو

صبح خورشید پہ اب ابر کے ساۓ ہوۓ ہیں

————————————-

غزل

باعث   آزارئ   و   رسوائی  میرے   ساتھ   ہے

پھر  وہی  دنیا، وہی  ہرجائی میرے  ساتھ  ہے

دل  کی قیمت  پر کیا ہے میں نے سودا عقل کا

اورسمجھتا ہوں کہ اب دانائی میرے ساتھ ہے

کس لۓ  میں  ہوں اکیلا ، کس لۓ تنہا ہوں میں

خواہش  یک  انجمن آرائی   میرے   ساتھ  ہے

چھیڑدیتی ہےکبھی تیرہ شبی میں دل کا ساز

اک  گل تر  کی ابھی  رعنائی میرے  ساتھ  ہے

رنگ   بازار    تمنا   اڑ    گیا    کب    کا    مگر

اس کی ساری زینت و زیبائ میرے  ساتھ  ہے

جھوٹ کہتا ہوں امید وصل پر زندہ ہوں میں

پر  یہی سچ  ہے، یہی سچائی میرے ساتھ ہے

یہ سخن سازی، یہ شعروشاعری، یہ کار شوق

جوہر   یک  جذبۂ   یکتائی  میرے   ساتھ  ہے

————————————-

غزل

پھر کسی خواب کی پلکوں پہ سواری آئی

خوش   امیدی   کو   لۓ    باد   بہاری   آئی

پھول آۓ  ہیں  نئ  رت کے نئی شاخوں پر

موجۂ    ماہ    دل    آرام    کی  باری   آئی

نامرادانہ    کہیں    عمر   بسر    ہوتی    ہے

شادکامی   کے     لۓ     یاد    تمہاری    آئی

اور   پھر  پھیل  گیا  رنگ  محبت   رخ  پر

لالۂ    زخم     لۓ     یار    کی    یاری    آئی

ایک دن ہم  نے زباں کھول دی سچ کہنے کو

اور     پھر     شامت    اعمال   ہماری   آئی

ہوس  و  عشق  کے  احوال  رقم   کرنے  کو

پردۂ    شعر    میں    افسانہ   نگاری    آئی

————————————-

غزل

دل تو اک شخص کو نخچیر  بنانے  میں  گیا

ساز     دل     نغمۂ     دلگیر   بنانے  میں  گیا

رات  اک خواب  جو  دیکھا تو  ہوا یہ معلوم

دن بھی اس خواب کی تصویر بنانے میں گیا

پرتو    خانۂ    موہوم     غنیمت    تھا    مگر

وہ  بھی  اک   نقشۂ  تعمیر  بنانے   میں   گیا

روح تو روح  ہے کچھ  بس نہیں اس پر لیکن

یہ  بدن  خاک   کو  اکسیر   بنانے    میں  گیا

یار    تو    درہم   و   دینار   بنانے   میں   گۓ

اور   میں  درد   کی  جاگیر   بنانے  میں  گیا

شعر   تاثیر   سے   خالی   ہوا   وقت   تعبیر

نفس  مضمون  بھی  تقریر   بنانے   میں گیا

————————————-

غزل

   مطلب  کے  لۓ  ہیں ، نہ  معانی  کے  لۓ  ہیں

   یہ   شعر  طبیعت  کی   روانی  کے   لۓ  ہیں

جو میرے شب و روز میں شامل ہی نہیں تھے

کردار    وہی    میری    کہانی   کے    لۓ    ہیں

یہ    داغ   محبت    کی   نشانی   کے   علاوہ

اے   عشق   تری  مرثیہ  خوانی  کے   لۓ  ہیں

آتی   ہے   سکوت   سحر   و  شام   کی   آواز

در   اصل  تو   ہم   نقل  مکانی   کے   لۓ  ہیں

جو رنگ  گل و لالہ و نسریں سے تھے منسوب

وہ   رنگ   اب   آشفتہ   بیانی  کے    لۓ   ہیں

————————————-

غزل

      یہ   احساس    تفاخر   کم    نہیں   ہے

      کہ   میرے   زخم   کا   مرہم   نہیں  ہے

       لۓ  پھرتے ہیں غم  اس کے اور اس کے

       کہ   جیسے   میرا  کوئی  غم  نہیں ہے

        محبت   کا  چمن   سرسبز  و  شاداب

        مگر   ریگ   ہوس   بھی  کم  نہیں ہے

        کہا  چپکے سے میرے  دل  نے اک روز

         یہ   دنیا   اتنی   بے ہنگم    نہیں   ہے

         چراغ  عشق  کب   سے   جل  رہا   ہے

         ذرا   ببھی  روشنی   مدھم  نہیں  ہے

         ابھی    مہتاب    آۓ   گا    سر     بام

         نہیں  یادوں   کا  یہ   موسم  نہیں ہے

————————————-

غزل

ایک  طوفان   کاب سامان  بنی  ہے  کوئی چیز

ایسا  لگتا ہے کہیں  چھوٹ  گئ  ہے کوئی چیز

سب کو اک ساتھ  بہاۓ  لۓ  جاتا  ہے  یہ سیل

وہ  تلاطم  ہے کہ اچھی نہ  بری  ہے کوئی چیز

ایک  میں  کیا   کہ  مہ و سال اڑے  جاتے  ہیں

اے ہوا تجھ سے زمانہ میں بچی ہے کوئی چیز

عشق  نے  خود  رخ  گلنار  کو  بخشا  ہے فروغ

ورنہ  کب  اپنے  بناۓ  سے  بنی  ہے  کوئی چیز

یعنی  زخموں  کے گلستاں  پہ  بہار  آ گئ  پھر

یعنی اب بھی مری آشفتہ سری  ہے کوئی چیز

شاعری  کیا  ہے  مجھے  بھی  نہیں معلوم مگر

لوگ کہتے ہیں کہ یہ دل کی لگی ہے کوئی چیز

————————————-

غزل

اب  تک جو  کیا ہے، کبھی ایسا  نہ کریں گے

لو کام  کوئی عشق و ہوس  کا  نہ  کریں گے

اس  بار  نکالیں  گے  کوئی  اور  ہی صورت

آنکھوں  کو   رہین  رخ   دنیا   نہ  کریں  گے

ہم بھول بھی جائیں گے تجھے اے دل بیمار

اے  درد   محبت   تجھے   بیگانہ  کریں  گے

بس    اک   گل   تصویر    پۓ    عرض   تمنا

بس  اور   کوئی  زخم   گوارا   نہ  کریں  گے

جیسے  کہ   کسی  ابر   گماں  سے   نکل  آۓ

جیسے  کہ  کبھی خواب  تماشا  نہ  کریں گے

سو   سال    رہے    کوچۂ    مہتاب   سلامت

فی الحال  مگر چشم  جنوں  وا  نہ کریں گے